ភ្នំពេញ៖ ស្ថានទូតព្រះរាជាណាចក្រកម្ពុជាប្រចាំសាធារណរដ្ឋសិង្ហបុរី ឱ្យដឹងថា ចាប់ពីថ្ងៃទី២២ ខែកុម្ភៈ ឆ្នាំ២០២២ អ្នកដំណើរមកពីកម្ពុជាអាចចូលសិង្ហបុរីបានដោយពុំចាំបាច់ធ្វើតេស្ត PCR នោះទេ។

ក្នុងសេចក្ដីប្រកាសចុះថ្ងៃទី១៩ ខែកុម្ភៈ ស្ថានទូតកម្ពុជាបញ្ជាក់ថា អ្នកដែលបានបំពេញតាមលក្ខខណ្ឌអាចចូលសិង្ហបុរីបានគ្រាន់តែដាក់ពាក្យសុំ Vaccinated Travel Pass តែប៉ុណ្ណោះ។ ខណៈការធ្វើដំណើរតាមផ្លូវអាកាសនឹងមិនតម្រូវឲ្យធ្វើតេស្ត PCR នៅពេលមកដល់ព្រលានយន្តហោះនៅសិង្ហបុរីទៀតទេ តែត្រូវជំនួសដោយការធ្វើតេស្តរហ័សក្រោមការត្រួតពិនិត្យ (Supervised self-swab antigen rapid test ART) នៅមណ្ឌលធ្វើតេស្ត ឬគ្លីនិក ក្នុងអំឡុងពេល២៤ម៉ោងនៃការមកដល់សិង្ហបុរី។

ស្ថានទូតបញ្ជាក់បន្ថែមថា អ្នកដំណើរតាមផ្លូវ VTL ក៏នឹងមិនតម្រូវឲ្យធ្វើតេស្ត ART ប្រចាំថ្ងៃ ពីថ្ងៃទី២ ដល់ថ្ងៃទី៧ បន្ទាប់ពីការមកដល់ដូចមុនទៀតដែរ។

សម្រាប់អ្នកចង់ធ្វើដំណើរទៅកាន់សិង្ហបុរី សូមដាក់ពាក្យស្នើសុំ Vaccinated Travel Pass តាមរយៈគេហទំព័រ៖ eservices.ica.gov.sg/ST01/VTL។ សម្រាប់ព័ត៌មានលម្អិតទាក់ទងនឹងលក្ខខណ្ឌធ្វើដំណើរ សូមចូលទៅកាន់ 1591: safetravel.ica.gov.sg/vtl/requirements-and-process ៕